భారత్-పాకిస్థాన్ మధ్య ప్రస్తుతం నెలకొన్న ఉద్రిక్త పరిస్థితుల నేపథ్యంలో భారత్ నుంచి చేసుకుంటున్న దిగుమతులను పాక్ ఆపేసింది. భారత్ నుంచి పత్తి, కూరగాయలను పాక్ దిగుమతి చేసుకుంటోంది. ప్రస్తుతం ఇరు దేశాల మధ్య ఉద్రిక్త పరిస్థితులు నెలకొనడంతో వాటి దిగుమతులను తాత్కాలికంగా నిలిపివేసింది. ఎటువంటి హెచ్చరికలు కానీ, నోటీసులు కానీ లేకుండానే పాక్.. భారత్ నుంచి పత్తి, కూరగాయల దిగుమతిని ఆపేసిందని కాటన్ ఇంపోర్టర్స్ అండ్ కస్టమ్స్ క్లియరింగ్ ఏజెంట్లు తెలిపారు. మరోవైపు తమ దేశంలోని రైతుల సంక్షేమం కోసమే భారత్ నుంచి దిగుమతులు ఆపేసినట్టు డిపార్ట్‌మెంట్ ఆఫ్ ప్లాంట్ ప్రొటెక్షన్(డీపీపీ) చీఫ్ ఇమ్రాన్ షమీ తెలిపారు.''మా రైతులను రక్షించుకునేందుకే భారత్ నుంచి టమాటా, ఇతర తాజా కూరగాయల దిగుమతిని రద్దు చేశాం. మా దగ్గరే చాలినన్ని టమాటాలు, ఇతర కూరగాయలు ఉన్నాయి. మా దగ్గర కొరత ఉంటేనే వాటిని దిగుమతి చేసుకునేవాళ్లం'' అని ఇమ్రాన్ వివరించారు. అయితే భారత్ నుంచి పత్తి దిగుమతులను మాత్రం ఆపలేదని, భారత్ ఎగుమతులు తమ బయో సెక్యూరిటీ షరతులకు అనుగుణంగా లేకపోవడంతో ఆంక్షలు విధించామని తెలిపారు.తమ రిపోర్టులు తప్పని తేలితే తిరిగి పత్తి దిగుమతులపై ఉన్న ఆంక్షలు ఎత్తివేస్తామని ఇమ్రాన్ పేర్కొన్నారు.