చైనా ఉక్కిరిబిక్కిరి అవుతోంది. దేశంలోని 40 నగరాలను కాలుష్య భూతం కమ్మేసింది. ఉత్తర చైనాలోని 23 నగరాల్లో రెడ్ అలర్ట్ ప్రకటించారు. వీటిలో బీజింగ్, టియాంజిన్ కూడా ఉన్నాయి. మరో 17 నగరాల్లో ఆరెంజ్ అలర్ట్ ప్రకటించారు. ఈ పరిస్థితి రానున్న రెండు మూడు రోజుల్లో మరింత క్షీణించవచ్చని జాతీయ వాతావరణ పరిశోధన కేంద్రం హెచ్చరించింది. పొగ చుట్టేయడంతో టియాంజిన్ నుంచి వెళ్లవలసిన 35 విమానాలను రద్దు చేశారు. ఏమీ కనిపించని పరిస్థితి తలెత్తడంతో ఈ నగరానికి చేరుకునే దారులను మూసేశారు. బీజింగ్‌తో పాటు ఇతర నగరాల్లోనూ వాహనాల రాకపోకలను నియంత్రిస్తున్నారు. ఎయిర్ క్వాలిటీ ఇండెక్స్ 253కు చేరడం అక్కడి కాలుష్య తీవ్రతను సూచిస్తోంది. పర్యావరణ పరిరక్షణ శాఖ 13 తనిఖీ బృందాలను వివిధ ప్రాంతాలకు పంపింది. అనుమతలు లేని పరిశ్రమలపైనా ప్రభుత్వం దృష్టి సారించింది.