మెక్సికోలో జరిగిన భారీ పేలుడులో 26 మంది మృతిచెందగా.. 70 మందికి పైగా గాయపడ్డారు. రాజధాని నగరమైన మెక్సికో సిటీలోని బాణాసంచా మార్కెట్‌లో మంగళవారం రాత్రిఈ పేలుడు సంభవించింది. క్షతగాత్రులను సమీపంలోని పలు ఆస్పత్రులకు తరలించి చికిత్స అందిస్తున్నారు. క్రిస్‌మస్‌, న్యూఇయర్‌ వేడుకల నేపథ్యంలో బాణాసంచా కొనుగోలు చేసేందుకు భారీ సంఖ్యలో ప్రజలు తరలిరావడంతో మార్కెట్‌ కిటకిటలాడుతోంది. ఆ సమయంలో ఒక్కసారిగా పేలుడు సంభవించి బాణాసంచా దుకాణాలు దగ్ధమయ్యాయి. పేలుడు ధాటికి సమీపంలోని ఇళ్లు, వాహనాలు ధ్వంసమయ్యాయి. ఈ ఘటనలో మార్కెట్‌ మొత్తం దగ్ధమైంది. మూడు గంటలు శ్రమించిన తర్వాత మంటలు అదుపులోకి వచ్చినట్లు అగ్నిమాపక సిబ్బంది వెల్లడించారు.

ఈ పేలుడుపై మెక్సికో అధ్యక్షుడు ఎన్రిక్‌ పెనా నియోటో తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు.