భారత్‌లో అమెరికా రాయబారి రిచర్డ్‌ రాహుల్‌వర్మ జనవరి 20కి ముందే తన పదవి నుంచి వైదొలగనున్నారు! ప్రస్తుత అధ్యక్షుడు బరాక్‌ ఒబామా నియమించిన రాయబారులను కొనసాగించేందుకు అమెరికా భావి అధ్యక్షుడు డొనాల్డ్‌ ట్రంప్‌ సుముఖంగా లేరు. ఈ నేపథ్యంలో ఆయన ప్రమాణ స్వీకారానికి ముందే కొందరు అధికారులు వైదొలగనున్నారు.
అమెరికాలో ఈ పదవి పొందిన తొలి భారతీయ అమెరికన్‌ రిచర్డ్‌వర్మ (48) కావడం విశేషం. ఆయన హయాంలో భారత్‌, అమెరికా సంబంధాలు మరింత బలపడ్డాయి. అమెరికా చట్టసభల్లో భారత్‌కు అనుకూలంగా పౌర అణు ఒప్పందం ఆమోదింపచేయడంలో ఆయన కీలక పాత్ర పోషించారు. 2014లో అమెరికాలో భారత రాయబారి దేవయానీ కోబ్రాగడే వివాదం కారణంగా అప్పటి అమెరికా రాయబారి నాన్సీపావెల్‌ స్థానంలో రిచర్డ్‌వర్మను ఒబామా నియమించారు.