మనామా: మూడు నెలల చిన్నారి హత్య కేసులో నిందితులకు జైలు శిక్షను విధించింది హై క్రిమినల్‌ కోర్ట్‌. 21 ఏళ్ళ స్టెప్‌ మదర్‌కి మూడు సంవత్సరాల జైలు శిక్ష విధించగా, మృతుడి తండ్రికి ఏడేళ్ళ జైలు శిక్షను ఖరారు చేసింది. భార్యతో విడాకులు తీసుకున్న తర్వాత, బిడ్డను తనతోనే ఉంచుకున్నాడు నిందితుడు. ఆ వ్యక్తి నిందితురాలితో కలిసి జీవనం సాగించాడు. ఓ రోజు తలపై గాయాలతో చిన్నారిని ఆసుపత్రికి చేర్చారు వారిద్దరూ. కింద పడి గాయాలపాలయ్యాడని నిందితుడు చెప్పాడు. అయితే నిందితురాలి సమాధానం ఇంకోలా ఉండటంతో ఆసుపత్రి వర్గాలు అనుమానించాయి. అయితే బాబు చనిపోయాడు. దాంతో పోలీసులు కేసు విచారణలో భాగంగా ఇద్దరికీ ఫోరెన్సిక్‌ పరీక్షలు జరిపారు. ఈ పరీక్షల్లో మృతుడి తండ్రి, అలాగే పెంపుడు తల్లి నిందితులని తేలింది. దారుణంగా కొట్టి ఆ చిన్నారిని ఆ ఇద్దరూ చంపినట్లు నిర్ధారించారు.