పాపం.. ఇంగ్లాండ్‌! క్రికెట్‌లో ప్రతి ఫార్మాట్‌లో భారత్‌ చేతిలో భంగపాటు తప్పడం లేదు. మొన్న కోహ్లీసేన చేతిలో టెస్టు, వన్డే, టీ20 సిరీస్‌లు కోల్పోయింది. స్వదేశంలో జరుగుతున్న అంధుల క్రికెట్‌ ప్రపంచకప్‌లో భారత్‌తో జరిగిన టీ20లోనూ చిత్తు చిత్తుగా ఓడింది. ఇప్పుడు యూత్‌వన్డే అండర్‌-19 ఐదు మ్యాచ్‌ల సిరీస్‌లోనూ కోల్పోయింది. సోమవారం జరిగిన నాలుగో వన్డేలో టీమిండియా కుర్రాళ్లు ఇంగ్లాండ్‌ను 230 పరుగుల భారీ తేడాతో ఓడించారు.

తొలుత బ్యాటింగ్‌ చేసిన భారత్‌..

శుభమ్‌ గిల్‌ (160 నాటౌట్‌; 120 బంతుల్లో), పృథ్వీషా (105; 89 బంతుల్లో) అద్భుత శతకాలు సాధించడంతో 9 వికెట్ల నష్టానికి 382 పరుగులు చేసింది. ఈ జోడీ రెండో వికెట్‌కు 164 బంతుల్లో 231 పరుగుల భారీ భాగస్వామ్యం నెలకొల్పింది. తర్వాత భారీ లక్ష్య ఛేదనకు దిగిన ఇంగ్లాండ్‌ను బౌలర్లు చుట్టేశారు. కమలేశ్‌ నాగర్‌కోటీ (4/31), వివేకానంద తివారీ (3/20), శివమ్‌ మావీ (2/18), ముగ్గురూ కలిసి తొమ్మిది వికెట్లు పడగొట్టడంతో ఇంగ్లిష్‌ జట్టు 152 పరుగులకే ఆలౌటైంది. ఈ విజయంతో భారత్‌ 3-1తో సిరీస్‌ను కైవసం చేసుకొంది.