ప్రముఖ మెసెంజర్‌ వాట్సాప్‌ తన వినియోగదారుల ఖాతాలకు మరింత భద్రత కల్పించేందుకు కొత్త భద్రతా విధానాన్ని తీసుకొచ్చింది. ఆండ్రాయిడ్‌, ఐవోఎస్‌, విండోస్‌ వినియోగదారులందరికీ రెండంచెల వెరిఫికేషన్‌ విధానాన్ని ప్రవేశపెట్టింది. అంతకుముందు చాలా కాలం పాటు దీన్ని బీటా వెర్షన్‌లో పరీక్షించిన ఆ సంస్థ ఎట్టకేలకు కొత్త ఆప్షన్‌ను వినియోగదారులకు అందుబాటులోకి తీసుకొచ్చింది. కొత్తగా తీసుకొచ్చిన ఆప్షన్‌తో ఖాతాను మరింత పదిల పరుచుకోవచ్చు. తాజాగా తీసుకొచ్చిన ఫీచర్‌ ఆప్షనల్‌ మాత్రమే. ఈ ఫీచర్‌ను ఉపయోగించుకోవాలని అనుకునేవారు వాట్సాప్‌ సెట్టింగ్స్‌లోని అకౌంట్‌ సెట్టింగ్స్‌లోకి వెళితే 'టు-స్టెప్‌ వెరిఫికేషన్‌' ఆప్షన్‌ కనిపిస్తుంది.

అందులో ఆరు అంకెల పాస్‌వర్డ్‌ను పెట్టుకోవాల్సి ఉంటుంది. దాని తర్వాత ఈ-మెయిల్‌ ఐడీని ఇవ్వాల్సి ఉంటుంది. పాస్‌వర్డ్‌ మరిచిపోయినప్పుడు ఈ-మెయిల్‌ పనికొస్తుంది. అయితే, ఈ-మెయిల్‌ ఐడీని ఇచ్చేటప్పుడు జాగ్రత్తగా ఇవ్వాల్సి ఉంటుందని, ఒకవేళ తప్పుడు ఐడీ ఇస్తే ఆ లింక్‌ వేరే వాళ్లకు వెళ్లే ప్రమాదముందని కంపెనీ పేర్కొంది. కాగా, తాజాగా తీసుకొచ్చిన ఫీచర్‌తో మీ అకౌంట్‌ను వేరేవాళ్లు వెరిఫై చేసే వీలుండదు. ఒక వేళ కొత్తగా ఫోన్‌ మార్చాలనుకునేటప్పుడు ఈ ఆరంకెల పాస్‌వర్డ్‌ను ఎంటర్‌ చేయాల్సి ఉంటుంది.