అంకారా : రీనా నైట్‌క్లబ్‌లో కాల్పులకు పాల్పడ్డ నిందితున్ని అరెస్ట్‌ చేసినట్టు టర్కీ పోలీస్‌ ఉన్నతాధికారులు తెలిపారు. ఇస్తాంబుల్‌ నైట్‌క్లబ్‌లో నూతన సంవత్సర వేడుకలు జరుగుతుండగా కొందరు గుర్తు తెలియని దుండగులు చొరబడి కాల్పులకు పాల్పడ్డ సంగతి తెలిసిందే. ఈ దుర్ఘటనలో 39 మంది మృతి చెందగా, మరో 65 మంది గాయపడ్డారు. కాల్పుల ఘటనతో సంబంధమున్న నలుగురు ఉగ్రవాదులను పోలీసులు గతనెలలో అరెస్ట్‌ చేశారు.
మిగతా నిందితుల కోసం గాలిస్తున్నారు. బుధవారం ఇస్తాంబుల్‌లో సోదాలు నిర్వహిస్తుండగా 22 ఏండ్ల యువకుడు అనుమానాస్పదితంగా సంచరించడాన్ని గమనించామని చెప్పారు. అతన్ని అదుపులోకి తీసుకొని విచారించగా రీనా నైట్‌క్లబ్‌ కాల్పుల ఘటనతో సంబంధాలున్నట్టు అంగీకరించాడని పోలీస్‌ ఉన్నతాధికారి ఒకరు తెలిపారు.