యుఏఈలో బంగ్లాదేశీ కార్మికుడు జహిర్‌ రెహ్మాన్‌, తనకు దొరికిన వాలెట్‌ని తనతోపాటు తీసుకెళ్ళిపోకుండా, అది పోగొట్టుకున్న వ్యక్తికి తిరిగిచ్చి నిజాయితీని చాటుకున్నాడు. వివరాల్లోకి వెళితే, 42 ఏళ్ళ జహిర్‌ రెహమ్మాన్‌, నెలవారీగా 700 దిర్హామ్‌లు జీతానికి పనిచేస్తుంటాడు. పార్క్‌లోని ఓ బెంచ్‌పై అతనికి ఓ వాలెట్‌ కన్పించింది. అయితే దాన్ని అతను తీసుకుని, గంట సమయానికి పైగా ఎదురుచూశాడు ఎవరైనా దాని కోసం వస్తారేమోనని. అంతలో ఓ వ్యక్తి కంగారు పడుతూ ఆ వాలెట్‌ కోసం వచ్చాడు. జర్మనీకి చెందిన ఆండ్రియాస్‌ క్రాస్‌, ఆ వాలెట్‌ని పోగొట్టుకున్న వ్యక్తి. ఆండ్రియాస్‌ రాగానే, వివరాలు తెలుసుకుని రెహ్మాన్‌ అతనికి ఆ వ్యాలెట్‌ని ఇచ్చేశాడు. నేను కష్టపడి పనిచేసి డబ్బు సంపాదించుకోగలను, వేరొకరి సొమ్ము కోసం ఆశపడనని ఈ సందర్భంగా రెహ్మాన్‌ చెప్పాడు. యూఏఈలో 15 ఏళ్ళుగా పనిచేస్తున్నాడాయన. ఈ సంఘటనను తాను ఎప్పటికీ మర్చిపోలేనని తన విలువైన డాక్యుమెంట్స్‌, కొంత నగదు, డెబిట్‌ కార్డ్స్‌, హెల్త్‌ ఇన్స్యూరెన్స్‌ ఇవన్నీ ఆ వ్యాలెట్‌లోనే ఉన్నాయని, రెహ్మాన్‌ రియల్‌ హీరో అని వాలెట్‌ సొంతదారు ఆండ్రియాస్‌ చెప్పారు. తన వ్యాలెట్‌ని తనకిచ్చినందుకుగాను ఆండ్రియాస్‌, రెహమాన్‌కి ప్రోత్సాహకం అందజేశారు.