బాలీవుడ్‌ నటుడు ఆమిర్‌ ఖాన్‌ తన తాజా చిత్రం ‘దంగల్‌’ను పాకిస్థాన్‌లో విడుదల చేయడానికి ఒప్పుకోలేదు. 2016లో జమ్మూకశ్మీర్‌లోని ఉరీ దాడులు జరిగిన నేపథ్యంలో పాక్‌లో భారత సినిమాలను నిలిపివేశారు. ఆ తర్వాత గొడవలు సర్దుమణిగాక భారత సినిమాలపై నిషేధాన్ని పాక్‌ ఎత్తివేసింది. దంగల్‌ సినిమా విడుదలైనప్పుడు పాకిస్థాన్‌కి చెందిన లోకల్‌ డిస్ట్రిబ్యూటర్లు పాక్‌లోనూ సినిమా విడుదల చేయాలని కోరారు. ఇందుకు ఆమిర్‌ కూడా ఒప్పుకున్నారు. అయితే దంగల్‌ సినిమాలోని ఓ సన్నివేశంలో భారత జాతీయ జెండా, జాతీయ గీతం ఉండడంతో ఆ సన్నివేశాలని తొలగించాలని పాకిస్థాన్‌ సెన్సార్‌ బోర్డు ఆదేశించింది. ఇందుకు ఆమిర్‌ ఒప్పుకోలేదు.
ఈ క్రీడకు సంబంధించిన సినిమా అని.. ఇందులో భారత్‌-పాక్‌కు మధ్య ఎలాంటి సంబంధంలేదని అలాంటప్పుడు జాతీయ గీతం సన్నివేశాలను తొలగించాల్సిన అవసరమేంటని ఆమిర్‌ ఆగ్రహం వ్యక్తం చేశారు. దాంతో మొత్తానికి సినిమాని పాకిస్థాన్‌లో విడుదల చేయడానికి ఆమిర్‌, సినీ బృందం ఒప్పుకోలేదని బాలీవుడ్‌ వర్గాల సమాచారం.