భారత ప్రధాని నరేంద్ర మోదీ ప్రారంభించిన స్వచ్ఛ భారత్‌ కార్యక్రమం పోస్టర్ల రూపంలో ఆకట్టుకుంటోంది. బాలీవుడ్‌ నటులు అమితాబ్‌ బచ్చన్‌, శశికపూర్‌, నిరూపా రాయ్‌ నటించిన ‘దీవార్‌’ సినిమా పోస్టర్‌పై స్వచ్ఛ భారత్‌ గురించి వివరిస్తూ రాసిన డైలాగ్‌ వైరల్‌గా మారింది. ఆ సినిమాలో నటి నిరూపా రాయ్‌.. అమితాబ్‌, శశికి తల్లిగా నటించింది. ఈ కథలో కొడుకులిద్దరూ తల్లి ఎవరితో ఉండాలన్న దానిపై గొడవపడుతుంటారు. అయితే ఈ కథనే స్వచ్ఛ భారత్‌ సారాంశంగా మారుస్తూ.. పోస్టర్‌పై ఓ డైలాగ్‌ రాశారు. ఓ పక్క తల్లి తనతోనే ఉండాలని అమితాబ్‌, కాదు తనతోనే ఉండాలని శశికపూర్‌ అంటుంటారు. కానీ నిరూపా మాత్రం ‘ఎవరైతే ముందు మరుగుదొడ్డి కట్టిస్తారో వారితోనే ఉంటాను’ అంటుంది. స్వచ్ఛభారత్‌ కార్యక్రమం గురించి అవగాహన కల్పించడం కోసం ఉత్తరాఖండ్‌లోని నైనిటాల్‌లో ఈ పోస్టర్‌ను పెట్టారు. దీనిని సాహు అనే నెటిజన్‌ మోదీకి ట్వీట్‌ చేశాడు. దీనిని మోదీ రీట్వీట్‌ చేస్తూ.. ‘హా హా..

పరిశుభ్రత గురించి చెప్పడానికి సినిమా పోస్టర్‌ని వాడుకున్నారు. వినూత్నమైన ఆలోచన’ అని పేర్కొన్నారు.