అర్ధాంతరపు జీవితాలు..!!

- April 13, 2017 , by Maagulf

కాటేయాలని ఎదురుచూస్తున్న
కాలానికి అందని అగాధపు లోతులలో
నిర్భయంగా నిలబడిన క్షణాలు

తలపుల వడపోతలో మిగిలిన
గతపు గాయాలు తడిమిన చెమ్మగింతలలో
అలసిన మదికి జ్ఞాపకాల ఆలంబనలు

అక్షరాలను అల్లిన భావాలు
విప్పిచెప్పిన కాగితాల కళాపోషణలో
వెల్లువెత్తిన అనుభవసారాలు

ఒంటరితనానికి ధీటుగానిలిచిన
ఏకాంతానికి చేరువగా చేరిన సర్దుబాట్లలో
అక్కడక్కడే తచ్చాడుతున్న ఆత్మీయతలు

పలవరింతలుగా మారిన
పలకరింతల్లో వినిపించని ప్రేమల మధ్యలో
అసంపూర్తిగా అలమటిస్తున్న అనుబంధాలు

యుగాల నిరీక్షణకు తెరదించే
అనునయాలకు ఆరాటపడుతున్న ఊసులలో
ముగిసిపోతున్న అర్ధాంతరపు జీవితాలు..!!


--యనమదల మంజు 

Click/tap here to subscribe to MAAGULF news alerts on Telegram
   

తాజా వార్తలు

- మరిన్ని వార్తలు

Copyrights 2015 | MaaGulf.com