20 వారాల గర్భంతో ఉన్న అమెరికా స్టార్‌ సెరెనా విలియమ్స్‌.. డబ్ల్యూటీఏ ర్యాంకింగ్స్‌లో టాప్‌ లేపింది. ఈ ఏడాది జనవరిలో జరిగిన ఆస్ట్రేలియన్‌ ఓపెన్‌ను రెండు మాసాల గర్భిణిగా నెగ్గి చరిత్ర సృష్టించిన సెరెనా.. తాజా ర్యాంకింగ్స్‌తో మరో రికార్డు నెలకొల్పింది. జర్మనీ భామ ఎంజెలికా కెర్బర్‌ పేలవ ఫామ్‌తో అగ్రస్థానం కోల్పోగా, సెరెనా నెం.1గా నిలిచింది. త్వరలోనే తల్లి కాబోతున్నట్టు 35 ఏండ్ల సెరెనా విలియమ్స్‌ గత బుధవారం వెల్లడించింది. సెరెనా విలియమ్స్‌, ఎంజెలికా కెర్బర్‌లు తొలి రెండు స్థానాల్లో నిలువగా, కరొలినా ఫ్లిస్కోవా (చెక్‌ రిపబ్లిక్‌), సిబుల్కోవా (స్లోవేకియా), సిమోన హలెప్‌ (రోమేనియా)లు తర్వాతి స్థానాల్లో నిలిచారు.