ఓ బాలిక కిడ్నాప్‌ చేయబడి, హత్యకు గురైనట్లుగా సోషల్‌ మీడియాలో సర్క్యులేట్‌ అవుతున్న వార్తని ఫేక్‌ న్యూస్‌గా రాయల్‌ ఒమన్‌ పోలీసులు ధృవీకరించారు. ఏడేళ్ళ బాలికని ఒమన్‌కి చెందిన ఓ వ్యక్తి కిడ్నాప్‌ చేశాడని, అలా కిడ్నాప్‌కి గురైన బాలిక విగతజీవిగా దొరికిందని సోషల్‌ మీడియాలో ఓ వార్త సర్క్యులేట్‌ అయ్యింది. కిడ్నాప్‌పై బాలిక తల్లి పోలీసులకు ఫిర్యాదు చేశారనీ, పోలీసుల విచారణలో బాలిక మృతదేహం దొరికిందని ఆ ఫేక్‌ వార్తలో పేర్కొన్నారు. ఇలాంటి ఫేక్‌ వార్తల పట్ల ప్రతి ఒక్కరూ అప్రమత్తంగా ఉండాలనీ, ఫేక్‌ న్యూస్‌ని ప్రచారం చేయడం మంచిది కాదని రాయల్‌ ఒమన్‌ పోలీసు వర్గాలు సూచించాయి. సోషల్‌ మీడియాలో ప్రతి ఒక్కరూ బాధ్యతగా వ్యవహరించాల్సి ఉంటుందని పోలీసు అధికారులు పేర్కొన్నారు.