తమిళసూపర్ స్టార్ రజనీకాంత్ రాజకీయ రంగ ప్రవేశం గురించి గత కొంతకాలంగా ఎన్నోవార్తలు. జయలలిత మరణంతో వీటిజోరు మరింత పెరిగింది. బిజెపి దన్నుతో రాజకీయాల్లోకి వస్తున్నారని కొన్ని ఊహాగానాలు చెలరేగితే, రజనీ సొంతంగా పార్టీ పెడతారని చాలా మంది భావించారు. దీనికి తోడు ఫ్యాన్స్ తో రజనీ తలపెట్టిన వరుస భేటీలు, ఆయా మీటింగ్స్ లో రజనీ చేస్తున్న వ్యాఖ్యలు వీటికి ఎంతోకంత బలాన్నిస్తున్నాయి.
తాజాగా రజనీకాంత్ పొలిటికల్ ఎంట్రీ గురించి బీజేపీ నేతలు చేస్తున్న ప్రకటనలు ఆసక్తికరంగా ఉంటున్నాయి. బిజెపి జాతీయ అధ్యక్షుడు అమిత్ షా రజనీ రాజకీయ ప్రవేశం గురించి స్పందించారు. మంచి వ్యక్తులను రాజకీయాల్లో స్వాగతిస్తున్నామంటూ రజనీకాంత్ ను గురించి వ్యాఖ్య చేసిన తర్వాతిరోజే, కేంద్రమంత్రి.. మాజీ బిజెపి జాతీయ అధ్యక్షుడు నితిన్ గడ్కరీ రజనీకాంత్ గురించి మరో కామెంట్ వదిలారు. రజనీకాంత్ కు బిజెపిలో సముచితస్థానం ఉంటుందని వ్యాఖ్యానించడం తమిళరాజకీయాలతోపాటు, దక్షిణాదిలోనూ ఇదో హాట్ టాపిక్ అయి కూర్చుంది..