మహారాష్ట్ర ముఖ్యమంత్రి దేవేంద్ర ఫడ్నవీస్‌కు పెను ప్రమాదం తప్పింది. ఆయన ప్రయాణిస్తున్న హెలికాప్టర్‌ లాతూర్‌ వద్ద క్రాష్‌ అయింది. ఈ ఘటనలో ముఖ్యమంత్రి ఫడ్నవీస్‌కు ఎలాంటి గాయాలు కాలేదు. తాను సేఫ్‌గా ఉన్నానని, కంగారు పడాల్సిన పని లేదని ఫడ్నవీస్‌ ట్వీట్‌ చేశారు.

సీఎంతో పాటు చాపర్‌లో ఉన్న టీం కూడా సేఫ్‌గా బయటపడినట్లు సమాచారం. కాగా, సీఎం ప్రయాణిస్తున్న హెలికాప్టర్‌ క్రాష్‌ ల్యాండ్‌ కావడంపై తనను షాక్‌కు గురి చేసిందని రైల్వే శాఖ మంత్రి సురేశ్‌ ప్రభు ట్వీట్‌ చేశారు. ఆయన బాగానే ఉన్నారని తెలియడం ఆనందకరమని అన్నారు.
కాగా, సీఎం హెలికాప్టర్‌ క్రాష్‌పై సీఎంవో ఓ ప్రకటన విడుదల చేసింది. హెలికాప్టర్‌లో తలెత్తిన సాంకేతిక లోపం కారణంగానే ప్రమాదం సంభవించినట్లు పేర్కొంది. పది రోజుల క్రితమే హెలికాప్టర్‌లో సమస్య తలెత్తినట్లు సమాచారం. అయినా హెలికాప్టర్‌ను ఎందుకు వినియోగించరానేది ప్రశ్నార్ధకంగా మారింది.