బర్మింగ్‌హామ్‌: ఐసీసీ ఛాంపియన్స్‌ ట్రోఫీలో డిఫెండింగ్‌ ఛాంపియన్‌ భారత్‌కు అదిరే ఆరంభం. ఐసీసీ టోర్నీలో చిరకాల ప్రత్యర్థి పాకిస్థాన్‌పై మరో అద్భుత విజయం. ఎడ్జ్‌బాస్టన్‌లో టీమిండియా దుమ్మురేపింది. అటు బ్యాటింగ్‌.. ఇటు బౌలింగ్‌లో తిరుగులేని ప్రదర్శన చేసింది. దాయాది దేశంపై 124 పరుగుల తేడాతో తిరుగులేని విజయం సొంతం చేసుకొంది. అంతకు ముందు కోహ్లీసేన 48 ఓవర్లలో 3 వికెట్ల నష్టానికి 319 పరుగులు చేసింది. వర్షం కురవడంతో డక్‌వర్త్‌ లూయిస్‌ పద్ధతిలో 41 ఓవర్లకు కుదించిన మ్యాచ్‌లో పాక్‌ 33.4 ఓవర్లకు 164 పరుగులకే ఆలౌట్‌ అయింది.