యెమెన్‌లో హింసాకాండ పెచ్చరిల్లుతోందని, పరిస్థితి క్షీణిస్తోందని ఐక్యరాజ్య సమితి అధికారులు శుక్రవారం హెచ్చరించారు. హుతీ రెబెల్స్‌ అధీనంలో గల ఉత్తర ప్రాంతంలో ఐరాస మానవతా సాయం అందించడానికి వెసులుబాటు కల్పించాల్సిన అవసరం వుందని ఐరాస మానవతాసాయం వ్యవహారాలు చూసే అధికారి స్టీఫెన్‌ ఓ బ్రియాన్‌ పేర్కొన్నారు. నిత్యావసర వస్తువులు తీసుకెళ్లే నౌకలకు ప్రవేశం నిరాకరిస్తున్న యెమెన్‌ ప్రభుత్వాన్ని ఆయన తీవ్రంగా విమర్శించారు. దాదాపు 80శాతం ఆహారపు దిగుమతులు చేరుకునే హుడెడా ఓడరేవుపై దాడులు జరగకుండా చర్యలు తీసుకోవడానికి ఐక్యరాజ్య సమితి కృషి చేస్తోందని చెప్పారు.