దుబాయ్‌కి చెందిన ఎమిరేట్స్‌ ఇంటిగ్రేటెడ్‌ టెలి కమ్యూనికేషన్స్‌ కంపెనీ (ఇఐటిసి), యూఏఈలో విర్జిన్‌ మొబైల్‌ సర్వీస్‌ని ప్రారంభించింది. వర్జిన్ మొబైల్‌ యూఏఈ యాప్‌, గూగుల్‌ ప్లే మరియు యాపిల్‌ యాప్‌ స్టోర్‌ ద్వారా డౌన్‌లోడ్‌ చేసుకోవచ్చు. ఈ యాప్‌ ద్వారా వినియోగదారులు తాము కోరుకున్న నెంబర్‌ని పొందవచ్చు. అలాగే, నచ్చిన ప్లాన్‌ని ఎంపిక చేసుకోవచ్చు. వర్జిన్ మొబైల్‌ యూఏఈ సిమ్‌కార్డ్‌ని, తమ ఇంటివద్దనే డెలివరీ పొందడానికి ఈ యాప్‌ అవకాశం కల్పిస్తుంది. స్టోర్‌ని సందర్శించకుండానే అన్ని రకాల సేవలూ పొందేలా ఈ యాప్‌ని రూపొందించారు. ఇఐటిసి సిఇఓ ఒస్మాన్‌ సుల్తాన్‌ మాట్లాడుతూ, వినియోగదారులకు మెరుగైన సేవలందించేందుకు ఎంతో శ్రమించామనీ, వర్జిన్ మొబైల్‌, ఈ రంగంలో కొత్త చరిత్ర సృష్టిస్తుందనీ చెప్పారు. వర్జిన్ గ్రూప్‌ ఫౌండర్‌ రిచార్డ్‌ డ్రాస్నన్‌ మాట్లాడుతూ, వర్జిన్ మొబైల్‌ బ్రాండ్‌ని యూఏఈలో ప్రారంభిస్తున్నందుకు ఆనందంగా ఉందన్నారు. యూఏఈలో తాము మంచి మార్కెట్‌ సంపాదిస్తామనీ, వినియోగదారులకు మెరుగైన సేవలందిస్తామని చెప్పారాయన.