యూఏఈ: ఆస్ట్రేలియాకి చెందిన క్వాంటాస్‌ విమానయాన సంస్థ నిర్వహిస్తోన్న ఎయిర్‌బస్‌ ఎ388 విమానం దుబాయ్‌ ఇంటర్నేషనల్‌ ఎయిర్‌పోర్ట్‌ నుంచి టేకాఫ్‌ అయిన వెంటనే తిరిగి వెనక్కి వచ్చేసింది. ఫ్లైట్‌ ట్రాకింగ్‌ వెబ్‌సైట్‌ ఫ్లైట్‌ అవేర్‌ వెల్లడించిన వివరాల ప్రకారం సాంకేతిక సమస్యతో దుబాయ్‌ చుట్టూనే చక్కర్లు కొట్టి, తిరిగి క్షేమంగా ఎయిర్‌పోర్ట్‌లో ల్యాండ్‌ అయ్యింది. క్వాంటాస్‌ అధికార ప్రతినిథి మాట్లాడుతూ, విమానానికి సంబంధించిన ఎయిర్‌ కండిషన్డ్‌ సిస్టమ్‌లో ఏర్పడ్డ చిన్నపాటి సాంకేతిక సమస్య కారణంగానే విమానం టేకాఫ్‌ అయిన తర్వాత తిరిగి వెనక్కి రప్పించేసినట్లు తెలిపారు. ప్రయాణీకులకు తగిన ఏర్పాట్లను చేసినట్లు విమానయాన సంస్థ ప్రతినిథులు వివరించారు.