న్యూయార్క్‌: ఖతారీ ఎమిర్‌ షేక్‌ తమీమ్‌ అల్‌ థని మాట్లాడుతూ, చిత్తశుద్ధితో గల్ఫ్‌ సంక్షోభం విషయంలో కువైట్‌ మధ్యవర్తిత్వం వహిస్తుండడం ఆహ్వానించదగ్గ విషయమని చెప్పారు. కువైట్‌ ఎమిర్‌ షేక్‌ సబా అల్‌ అహ్మద్‌ అల్‌ జబెర్‌ అల్‌ సబాకి ఈ సందర్భంగా కృతజ్ఞతలు చెబుతున్నానని అన్నారాయాన. గత కొంతకాలంగా గల్ఫ్‌లో నెలకొన్న సంక్షోభానికి సంబంధించి కువైట్‌ మద్యవర్తిత్వం వహిస్తోంది. ఖతార్‌ ఓ వైపు, సౌదీ అరేబియా, యూఏఈ, బహ్రెయిన్‌, ఈజిప్ట్‌ మరో వైపు నిలిచాయి. ఖతార్‌ తీవ్రవాదానికి మద్దతిస్తోందని మిగిలిన దేశాలు ఆరోపిస్తూ, ఖతార్‌తో సంబంధాలు తెంచుకోవడంతో సంక్షోభం తలెత్తింది. ఖతార్‌ ఎప్పుడూ తీవ్రవాదానికి మద్దతివ్వడంలేదని ఈ సందర్బంగా షేక్‌ తమీమ్‌ స్పష్టం చేశారు. జిసిసి దేశాల ఐక్యత కోసం ఖతార్‌ కృషి చేస్తుందనీ, సమాచార లోపంతోనే ఈ సమస్య తలెత్తిందని ఆయన అన్నారు.