లాక్‌ చేసిన కార్లలో చిన్నారుల్ని విడిచిపెట్టడం ప్రమాదకరమని ఎంతగా ప్రచారం చేస్తున్నా, హెచ్చరిస్తున్నా, కేసులు నమోదు చేస్తున్నా కూడా ఈ తరహా ఘటనలు ఇంకా చోటుచేసుకుంటూనే ఉండడం దురదృష్టకరం. ఈ ఏడాది ఇప్పటిదాకా 79 మంది చిన్నారులను లాక్‌ చేసిన కార్లలోంచి క్షేమంగా బయటకు తీశారు పోలీసులు. దుబాయ్‌ పోలీస్‌ డిప్యూటీ డైరెక్టర్‌ ఆఫ్‌ సెర్చ్‌ అండ్‌ రెస్క్యూ డిపార్ట్‌మెంట్‌ లెఫ్టిశ్రీనెంట్‌ కల్నల్‌ అహ్మద్‌ అతీజ్‌ బోర్‌గుయైబా మాట్లాడుతూ, కార్లలో చిన్నారుల్ని వదిలిపెట్టడం అత్యంత ప్రమాదకరమని చెప్పారు. 'ఏసీ ఉంది కదా అని వదిలేయడం కూడా ప్రమాదకరమే. ఎందుకంటే పిల్లలు కార్‌లో కుదురుగా ఉండరు. ఏదో ఒకటి చేస్తుంటారు, తద్వారా ప్రమాదాలు తప్పవు. ఒక్కోసారి ఏసీ ఆఫ్‌ అయిపోయి, ఊపిరి ఆడక చనిపోతుంటారు' అని వివరించారాయన. కాస్సేపు షాపింగ్‌ కోసం పిల్లల్ని తీసుకెళ్ళడం కష్టంగా భావించి తల్లిదండ్రులు కార్లలో తమ పిల్లల్ని విడిచిపెట్టడం దారుణమని ఆయన అన్నారు. అలాగే స్విమ్మింగ్‌ పూల్స్‌ విషయంలోనూ తల్లిదండ్రులు అప్రమత్తంగా ఉండాలన్నారు. తగినని సేఫ్టీ ప్రికాషన్స్‌ అక్కడ అందుబాటులో ఉన్నాయో లేదో తల్లిదండ్రులు చూసుకోవాలని లెఫ్టినెంట్‌ కల్నల్‌ బోర్‌గుయైబా చెప్పారు.