నేషనల్‌ సెంటర్‌ ఫర్‌ మిటియరాలజీ, పొగమంచు కారణంగా వాహనదారులు అప్రమత్తంగా ఉండాలని సూచించింది. దేశంలోని పలు ప్రాంతాల్లో పొగమంచు విపరీతంగా నెలకొంటోందని పేర్కొంది. దుబాయ్‌, షార్జా, అబుదాబీ ప్రాంతాల్లో పొగమంచు ఎక్కువగా కన్పిస్తోంది. ఖలీఫా కాలేజ్‌, దుబాయ్‌లోని అల్‌ మక్తౌమ్‌ ఇంటర్నేషనల్‌ ఎయిర్‌పోర్ట్‌ ప్రాంతాల్లో శనివారం తెల్లవారు ఝాము నుంచీ పొగమంచు విపరీతంగా నమోదైంది. పొగమంచు కారణంగా విజిబిలిటీ 1000 మీటర్ల కంటే తక్కువగా నమోదు కానుంది. పగటి పూట వాతావరణం బాగానే ఉంటుందనీ, ఒక్కోసారి పాక్షికంగా మేఘావృతం అవడం జరుగుతుంటుందని ఎన్‌సిఎంఎస్‌ పేర్కొంది. మేఘాలు సముద్ర తీర ప్రాంతాల్లో ఎక్కువగా కనిపిస్తాయి. అది కూడా సాయంత్రం వేళ మేఘాలు దర్శనమిస్తాయి. సాధారణం నుంచి ఓ మోస్తరు గాలులు వీయనున్నాయి. రాత్రి వేళలో హ్యుమిడిటీ శాతం పెరగనుంది. ఉష్ణోగ్రతలు 36 నుంచి 41 డిగ్రీల సెల్సియస్‌ వరకు నమోదు కావొచ్చు. హ్యుమిడిటీ లెవల్స్‌ అత్యధికంగా 95 శాతం వరకు ఉంటాయి. ఆది, సోమవారాల్లోనూ ఇదే తరహా వాతావరణ పరిస్థితులు కొనసాగుతాయి.