భారీ వర్షాల వల్ల తలెత్తిన ఆకస్మిక వరదల్లో కొట్టుకుపోయిన యువకుడి మృతదేహం ఎట్టకేలకు ఒమన్‌లో కనుగొన్నారు. నవంబర్‌ 16న 18 ఏళ్ళ ఆల్బర్ట్‌ జాయ్‌, తన ఐదుగురు స్నేహితులతో కలిసి వాహనంలో షికారుకి వెళ్ళగా, ఆకస్మిక వరదల్లో ఆ కారు చిక్కుకపోయింది. ఎమిరేటీ వ్యక్తి ఒకరు అత్యంత సాహసోపేతంగా ఆ కారులోంచి ఐదుగుర్ని కాపాడాడు. అయితే, దురదృష్టవశాత్తూ ఆల్బర్ట్‌ జాయ్‌ మాత్రం కారుతో సహా కొట్టుకుపోయాడు. అతన్ని రక్షించేందుకు అధికారులు ఎంతగా ప్రయత్నించినా ఫలితం లేకుండాపోయింది.రస్‌ అల్‌ ఖైమాలోని ఓ ఇంజనీరింగ్‌ కాలేజీలో ఆల్బర్ట్‌ విద్యనభ్యసిస్తున్నాడు. దుబాయ్‌లోని ఇండియన్‌ కాన్సుల్‌ జనరల్‌ విపుల్‌, బాధిత కుటుంబాన్ని నవంబర్‌ 21న పరామర్శించారు. షార్జా, అలాగే దుబాయ్‌ పోలీసులు, రెస్క్యూ టీమ్స్‌, అబుదాబీ పోలీస్‌ ఎయిర్‌ వింగ్‌ సంయుక్తంగా గాలింపు చర్యలు చేపట్టాయి. కానీ ఈ ఘటన విషాదాంతమయ్యింది.