స్కాట్లండ్‌: వేల్స్‌, ఇంగ్లాండ్‌, ఉత్తర ఐర్లండ్‌, దక్షిణ స్కాట్లండ్‌లోని కొన్ని ప్రాంతాలలో కొనసాగుతున్న ఎలీనార్‌ తుపాను ఆ ప్రాంతాలలో తీవ్ర విధ్వంసం సృష్టించింది. గంటకు దాదాపు 100 మైళ్ల వేగంతో వీచిన గాలుల ధాటికి విద్యుత్‌ వ్యవస్థ కుప్పకూలిపోవటంతో అనేక ఇళ్లు, భవనాలు చీకట్లో మగ్గుతున్నాయి. వేల్స్‌లోని గ్లామర్గాన్‌లో ఒక కారుపై చెట్టు కూలిన ఘటనలో ఒక వ్యక్తి తీవ్రంగా గాయపడ్డాడు. రైళ్లు, బస్సులతో పాటు ప్రతికూల వాతావరణం కారణంగా విమానాల రాకపోకల్లో సైతం తీవ్రమైన జాప్యం కొనసాగుతోంది. ఉత్తర ఐర్లండ్‌లో దాదాపు 3 వేల ఇళ్లకు విద్యుత్‌ సరఫరా నిలిచిపోయిందని అధికారులు చెప్పారు. ఇంగ్లండ్‌లో 2,700 ఇళ్లకు, వేల్స్‌లో 460 ఇళ్లకు కూడా విద్యుత్‌ సరఫరా నిలిచిపోయింది.