సంజయ్ దత్ బయోపిక్ అనుకున్న తేదీకి రావడం లేదు. షూటింగ్ డిలే కారణంగా ఈ చిత్రం మూడు నెలలు ఆలస్యంగా ఆడియెన్స్ ముందుకు రాబోతుందట.

ఈ ఏడాది బాలీవుడ్‎లో రాబోతున్న క్రేజీ ప్రాజెక్ట్స్‎లో ఒకటి సంజయ్ దత్ బయోపిక్ 'సంజు'. వారసత్వంగా సినీరంగంలోకి ప్రవేశించి ఆ తర్వాత జైలు బాట పట్టడం వంటి అనేక మలుపులు తిరిగిన సంజయ్ దత్ జీవిత కథతో ఈ చిత్రాన్ని ప్రముఖ దర్శకుడు రాజ్ కుమార్ హిరాణి తెరకెక్కిస్తున్నాడు. ఇక ఈ బయోపిక్‎లో సంజయ్ దత్‎గా ఆన్ స్క్రీన్‎పై సందడి చేయబోతున్నాడు బాలీవుడ్ లవర్ బోయ్ రణ్‎బీర్ కపూర్. విధు వినోద్ చోప్రా నిర్మిస్తోన్న ఈ సినిమాని మొదట మార్చి 30న విడుదల చేయనున్నట్టు ప్రకటించారు. అయితే షూటింగ్ డిలే కారణంగా ఈ సినిమాని మూడు నెలలు ఆలస్యంగా జూన్ 29న ప్రేక్షకుల ముందుకు తీసుకురానున్నారట. ఈ విషయాన్ని డైరెక్టర్ రాజ్ కుమార్ హిరాణి ట్విట్టర్ ద్వారా కన్ఫమ్ చేశాడు.

సంజయ్ దత్ నటించిన 'మున్నాభాయ్ ఎమ్.బి.బి.ఎస్' చిత్రంతోనే దర్శకుడిగా పరిచయమైన రాజ్ కుమార్ హిరాణి ఇప్పుడు 'సంజు' బయోపిక్‎ను ఎంతో ప్రతిష్ఠాత్మకంగా తెరకెక్కిస్తున్నాడట. బాలీవుడ్ లో అపజయమెరుగని దర్శకుడిగా పేరుగాంచిన హిరాణి.. ఈ సినిమాలో.. సంజయ్ దత్ పాత్రలో రణ్ బీర్ ను అద్భుతంగా ఆవిష్కరిస్తున్నాడట. అందుకు తగ్గట్టే సంజయ్ పాత్రలో ఒదిగిపోతున్నాడట చాక్లెట్ బోయ్ రణ్‎బీర్. ఈ చిత్రంలో సంజయ్ దత్ తండ్రి సునీల్ దత్‎గా పరేష్ రావల్, తల్లి నర్గీస్‎గా మనీషా కోయిరాలా నటిస్తుండగా సంజయ్ గాళ్ ఫ్రెండ్స్ అయిన టీనా మునిమ్ పాత్రలో సోనమ్ కపూర్, మాధురి దీక్షిత్ రోల్‎లో కరిష్మా టన్నా కనిపించబోతున్నారు. ఇక సంజయ్ దత్ భార్య మాన్యత దత్‎గా దియా మీర్జా నటిస్తోంది. 'పి.కె' వంటి బ్లాక్ బస్టర్ తర్వాత రాజ్ కుమార్ హిరాణి దర్శకత్వంలో వస్తోన్న సంజయ్ దత్ బయోపిక్.. ఎలాంటి విజయాన్ని సాధిస్తుందో చూడాలి.