స్టాఫ్‌ అకామడేషన్‌లో ఓ మహిళ స్నానం చేస్తుండగా, వీడియో తీసిన కేసులో ఓ వ్యక్తికి న్యాయస్థానం మూడు నెలల జైలు శిక్ష విధించింది. 21 ఏళ్ళ భారతీయుడొకరు ఈ ఘాతుకానికి పాల్పడ్డాడు. ఆఫీస్‌ అసిస్టెంట్‌గా పనిచేస్తున్న నిందితుడు, బాత్రూమ్‌లోని ఓ చిన్న రంధ్రాన్ని చేసి, ఆ రంధ్రం ద్వారా మొబైల్‌ ఫోన్‌ కెమెరా నుంచి లోపల స్నానం చేస్తున్న మహిళను వీడియో తీశాడు. 2017 అక్టోబర్‌ 10న ఈ ఘటనపై బాధితురాలు అల్‌ రఫా పోలీస్‌ స్టేషన్‌లో ఫిర్యాదు చేయడం జరిగింది. బాధితురాలు 28 ఏళ్ళ ఫిల్పినో జాతీయరాలు. విచారణలో నిందితుడు తన నేరాన్ని అంగీకరించాడు. తనను ఎవరో వీడియో తీస్తున్న విషయాన్ని తెలుసుకున్న బాధితురాలు గట్టిగా అరిచేసరికి, నిందితుడు అక్కడినుంచి పారిపోయే ప్రయత్నం చేశాడు. నేరాన్ని కప్పిపుచ్చుకునేందుకు తొలుత బుకాయించడంతోపాటుగా, మొబైల్‌లో తాను చిత్రీకరించిన వీడియో కూడా డిలీట్‌ చేసేశాడు నిందితుడు.