రష్యాకి చెందిన ఓ వ్యక్తి, దుబాయ్‌ ఇంటర్నేషనల్‌ ఎయిర్‌పోర్ట్‌లో పోలీస్‌ అధికారిపై దాడికి పాల్పడిన కేసుకి సంబంధించి కోర్టులో విచారణ జరుగుతోంది. 2017 నవంబర్‌ 26న ఈ ఘటన జరిగింది. అయితే నిందితుడు మాత్రం, తాను దాడి చేయలేదని అంటున్నాడు. ప్రాసిక్యూషన్‌ రికార్డుల ప్రకారం, పోలీస్‌ అధికారిని దాటి, నిషేధిత ప్రాంతంలోకి వెళ్ళేందుకు నిందితుడు ప్రయత్నించాడు. అడ్డుకున్న పోలీస్‌ అధికారిపై నిందితుడు పిడిగుద్దులు కురిపించాడు. ఈ విషయాన్ని బాధితుడైన పోలీస్‌ అధికారి పేర్కొన్నారు. తెల్లవారు ఝామున 2.45 నిమిషాల సమయంలో ఈ ఘటన జరిగింది. ప్రయాణీకులకు ప్రమాదకరమైన ప్రాంతం కావడంతో అటువైపు వెళ్ళకుండా నిషేధాజ్ఞలు ఉన్నాయని, అయితే నిందితుడు చాలా దారుణంగా ప్రవర్తించాడని పోలీస్‌ అధికారి తెలిపారు. తనపై తీవ్రంగా నిందితుడు దాడి చేయడంతో, సహాయం కోసం ఎయిర్‌పోర్ట్‌ ఆపరేషన్‌ రూమ్‌ని అలర్ట్‌ చేశానని, ఇతర సిబ్బంది వచ్చి నిందితుడ్ని పట్టుకున్నారని ఆ అధికారి వివరించారు. ఈ కేసులో తదుపరి విచారణ ఫిబ్రవరి 4వ తేదీకి వాయిదా పడింది.