కువైట్: కొండ నాలుకకు మందు వేస్తే ఉన్న నాలుక ఊడిపోయిన తీరున.. కువైట్ నుంచి ప్రవాసీయులను వారి దేశాలకు ఏదో ఒక కారణంతో పంపించడంతో ఆ నిష్క్రమణ ప్రభావం రియల్ ఎస్టేట్ మార్కెట్ పై తీవ్రంగా చూపుతుందని కువైట్ రియల్ ఎస్టేట్ అసోసియేషన్ కార్యదర్శి ఖ్ఐస్ అల్-గనేమ్ నిర్ధారించారు. గత ఏడాది ఈ సంక్షోభం గురించి కువైట్ రియల్ ఎస్టేట్ అసోసియేషన్ హెచ్చరించిందని సూచించారు. జూన్ 2018 నాటికి విదేశీయుల నిష్క్రమణ మరింత అధికమవడంతో ఇబ్బందులు ఎదుర్కోవల్సిఉందన్నారు. ప్రవాసీయులలో అత్యధికులు తమ దేశాలకు వెళ్లడం కన్నా  ఇతర గమ్యస్థానాలలో  మంచి అవకాశాలను వెతుకుతున్నారని ఆయన అన్నారు. వలసదారులపై  ఇటీవలి విధించిన ఒత్తిళ్లు ఫలితంగా పెట్టుబడి నివాస రంగంలో ముఖ్యంగా పెద్ద సంఖ్యలో ఖాళీలు ఏర్పడుతున్నాయని పేర్కొన్నారు. పెద్ద సంఖ్యలో ప్రవాసులు వారి కుటుంబాలను తమ తమ స్వంత దేశాలకు తిరిగి పంపించి, వారి నివాసాన్ని చెల్లుబాటు అయ్యేలా చేసుకొని బ్రహ్మచారులుగా కువైట్ లో ఉండటానికి సిద్ధపడుతున్నారు. క్రమేపి మారుతున్న ఈ ధోరణి కారణంగా  రియల్ ఎస్టేట్ రంగం యొక్క ప్రస్తుత పరిస్థితిని ఇంకా మరింత దిగజారుస్తుంది. ప్రభుత్వం ప్రవాసీయులకు సంబంధించిన నిర్ణయాలు ప్రకటించిన తర్వాత ప్రవాసీయులు పెద్ద ఎత్తున కువైట్ ను విడిచి వేరే ప్రాంతాలకు తరలివెళ్లిపోవడంతో ఇంటి అద్దెలు సైతం పెద్ద ఎత్తున తగ్గిపోయాయని ఆయన అన్నారు.