దుబాయ్‌:భారతదేశంలోని బెంగళూరుకి చెందిన టామ్స్‌ అరాకల్‌ మణి అనే అదృష్టవంతుడు దుబాయ్‌ డ్యూటీ ఫ్రీ మిలీనియం డ్రాలో 1 మిలియన్‌ డాలర్లను గెల్చుకున్నారు. 263 సిరీస్‌లో 2190 నెంబర్‌ టిక్కెట్‌ని ఆయన కొనుగోలు చేశారు. దుబయాన ఇంటర్నేషనల్‌ ఎయిర్‌పోర్ట్‌ కాంకోర్స్‌ డి వద్ద తీసిన డ్రాలో విజేతను ఎంపిక చేశారు. 38 ఏళ్ళ మణి, ఇంటర్నేషనల్‌ కార్డ్‌ కంపెనీలో పనిచేస్తున్నారు. ఓ రిటెయలర్‌ వద్ద 34వ యానివర్సరీ సందర్భంగా డిసెంబర్‌లో ఈ టిక్కెట్‌ని ఆయన కొనుగోలు చేశారు. 1 మిలియన్‌ డాలర్లు గెల్చుకున్న ఆనందాన్ని మాటల్లో వర్ణించలేనని ఆయన అన్నారు. 1999లో మొదలైన దుబాయ్‌ డ్యూటీ ఫ్రీ మిలీనియం ప్రమోషన్‌లో ఇప్పటిదాకా 124 మంది భారతీయులు 1 మిలియన్‌ డాలర్లను గెల్చుకున్నారు. ఇదిలా వుంటే 33 ఏళ్ళ లతా బరద్వాజ్‌ బిఎండబ్ల్యు 750 ఎల్‌ఐఎక్స్‌ డ్రైవ్‌ ఎం స్పోర్ట్‌ కారుని గెల్చుకున్నారు. ఆమె దుబాయ్‌ డ్యూటీ ఫ్రీ మాజీ ఉద్యోగి. ఒకప్పటి సన్నిహితుల్ని కలుసుకోవడం, కారుని గెల్చుకోవడం చాలా ఆనందంగా ఉందని ఆమె చెప్పారు.