చెన్నై:స్పైస్‌జెట్‌కు చెందిన భద్రతాధికారులు ఎయిర్‌హోస్టెస్‌లను అసభ్యంగా తనిఖీ చేయడంతో వారు శనివారం ఉదయం ఆందోళనలు చేపట్టారు. గత కొన్ని రోజులుగా విమానం డీబోర్డింగ్‌ అయ్యాక తమ వస్తువులను, తమను అధికారులు తనిఖీ చేస్తున్నారని, అదే కాకుండా తమ బ్యాగుల్లో ఉన్న శానిటరీ ప్యాడ్స్‌ను తొలగించాలని చెబుతున్నారని ఆవేదన వ్యక్తం చేశారు. ఆహారపదార్థాలు, ఇతర వస్తువులను ప్రయాణీకులకు ఇవ్వడానికి వారి నుండి డబ్బు వసూలు చేస్తున్నారనే ఆరోపణపై డీబోర్డింగ్‌ అయ్యాక వాష్‌రూమ్‌కు వెళ్ళకూడదని షరతు కూడా విధించారు. 'తమను గత మూడు రోజులుగా ఘోరంగా తనిఖీ చేస్తున్నారు. మహిళా సిబ్బంది అయినప్పటికీ అసభ్యంగా తాకుతున్నారు. తన కొలిగ్‌ను శానిటరీ ప్యాడ్‌ను తొలగించాలని ఆదేశించారు' అని ఓ ఎయిర్‌హోస్టెస్‌ తెలిపారు. అయితే... ఈ విషయాన్ని ఎయిర్‌లైన్స్‌ సంస్థ ఖండించింది. ఏ ప్రయాణీకుడికైనా, భారత్‌లోని ఏ విమానాశ్రయానికి వెళ్లినా, భద్రతా తనిఖీలు ఉంటాయని పేర్కొంది.