ఆఫ్రికా ఖండంలో శాంతి స్థాపనే లక్ష్యంగా మహా ధ్యాన కార్యక్రమాన్ని ఆధ్యాత్మిక నేత, ఆర్ట్‌ ఆఫ్‌ లివింగ్‌ వ్యవస్థాపకుడు శ్రీశ్రీ రవి శంకర్‌ నిర్వహించారు. దీనిలో లక్ష మందికిపైగా ఆఫ్రికావాసులు వెబ్‌క్యామ్‌ల సాయంతో పాల్గొన్నారు. ఈ కార్యక్రమం ఆఫ్రికాలో నిర్వహించడం ఇది ఆరోసారి. దీనిలో 20 ఆఫ్రికా దేశాలవాసులతోపాటు ఇతర దేశాల పౌరులూ పాల్గొన్నారు. ఉగాండాలోని పురుషుల జైలులో శిక్ష అనుభవిస్తున్న 66 మంది ఖైదీలూ దీనిలో పాలుపంచుకొన్నారు. ఎక్కువ మందికి చేరువ కావడమే లక్ష్యంగా రవిశంకర్‌ సూచనలతో ఈ కార్యక్రమాన్ని ఆఫ్రికా వ్యాప్తంగా రేడియోల్లో ప్రసారంచేశారు. దీనిలో ధ్యానంతో ఒనగూరే అమూల్యమైన ప్రయోజనాల గురించి రవిశంకర్‌ వివరించారు. కార్యక్రమానికి మంచి స్పందన లభించిన నేపథ్యంలో.. మరో వారం రోజులపాటు దీన్ని నిర్వహించాలని నిర్ణయించినట్లు ఆయన చెప్పారు.