గల్ఫ్‌ ఎమిరేట్‌ ఆఫ్‌ అబుదాబీ, ముగ్గురు వ్యక్తుల్ని అరెస్ట్‌ చేయాలని ఆదేశించింది. ఈ నేపథ్యంలో ముగ్గుర్ని పోలీసులు అదుపులోకి తీసుకున్నారు. కెనడియన్‌ హిప్‌ హాప్‌ సూపర్‌ స్టార్‌ డ్రేక్స్‌ హిట్‌ సాంగ్‌ 'ఇన్‌ మై ఫీలింగ్స్‌' పాటకి ఈ నిందితులు నడి రోడ్డుపై డాన్స్‌ చేయడమే వారు చేసిన నేరం. కికి డాన్స్‌ ఛాలెంజ్‌లో భాగంగా, వెళుతున్న కారులోంచి నెమ్మదిగా డోర్స్‌ ఓపెన్‌ చేసి, బయటకు వచ్చి మ్యూజిక్‌కి అనుగుణంగా డాన్స్‌ చేస్తుంటారు. ఇలా చేయడం ప్రమాదకరం. అందుకే నిందితులపై కఠిన చర్యలు తీసుకోనున్నారు. అయితే అరెస్ట్‌ చేసిన నిందితుల వివరాల్ని వెల్లడించలేదు. సోషల్‌ మీడియా వేదికగా ఈ 'కికి' డాన్స్‌ చాలెంజ్‌ వైరల్‌గా మారింది. ఇలాంటి చర్యలకు ఎవరైనా పాల్పడితే కఠిన చర్యలు తప్పవని అధికారులు హెచ్చరించారు.