అజిత్‌సింగ్‌నగర్‌  క్యాన్సర్‌ బాధితురాలైన తన అభిమాని కోరిక తీర్చేందుకు సినీనటుడు అల్లు అర్జున్‌ మంగళవారం విజయవాడలోని అజిత్‌సింగ్‌నగర్‌ విచ్చేసారు. దీంతో ఆ ప్రాంతమంతా సందడి వాతావరణం నెలకొంది. తమ అభిమాన హీరో వస్తున్నాడని తెలిసి యువకులందరూ అల్లు అర్జున్‌ను చూసేందుకు తరలివచ్చారు. అల్లు అర్జున్‌కు అభిమానులు పూలతో ఘన స్వాగతం పలికారు. మస్తాన్‌బీ అనారోగ్యానికి సంబంధించిన వివరాలు తెలుసుకొని, భయపడవద్దని భరోసా కల్పించారు. కొద్ది సేపు ఆమె కుటుంబంతో గడిపారు. అనంతరం మీడియాతో మాట్లాడుతూ... క్యాన్సర్‌తో బాధపడుతున్న షేక్‌ మస్తాన్‌బీ గురించి ఓ టీవీ ఛానెల్‌లో వచ్చిన కథనాన్ని చూసి పరామర్శించేందుకు వచ్చినట్లు తెలిపారు. తమ కుటుంబాన్ని ఇంతగా అభిమానించే అభిమానుల కోరిక తీర్చడం ఎంతో ఆనందంగా ఉందన్నారు.