శివ, సంతానం నటించిన 'యాయా' చిత్రాన్ని నిర్మించిన సంస్థ ఎం10 ప్రొడక్షన్స్‌. ప్రస్తుతం ఈ సంస్థ తెరకెక్కిస్తున్న చిత్రం 'బక్రీద్‌'. 'సిగై', 'పక్షి' చిత్రాలను తెరకెక్కించిన జగదీశన్‌ ఈ చిత్రానికి దర్శకత్వం వహిస్తున్నారు. కథ, స్క్రీన్‌ప్లే, మాటలు సమకూర్చడంతో పాటు సినిమాటోగ్రఫి బాధ్యతలు నిర్వర్తిస్తున్నారు. విక్రాంత్‌ హీరోగా నటిస్తున్నారు. చాలా గ్యాప్‌ తర్వాత ఆయన కథానాయకుడిగా నటిస్తున్న సినిమా ఇది. ఈ సినిమా గురించి దర్శకుడు జగదీశన్‌ మాట్లాడుతూ 'రైతుగా జీవించడమే గొప్పగా భావిస్తూ, ప్రతికూల పరిస్థితుల్లోనూ వ్యవసాయాన్ని చేసే ఓ వ్యక్తి జీవితంలోకి ఒంటె ప్రవేశిస్తుంది.

ఆ తర్వాత అతని జీవితం ఎలా మారిందన్నదే చిత్ర కథ. ఈ కథ దేశవ్యాప్తంగా నడుస్తుంది. అందుకే ఆయా రాష్ట్రాల్లోని సంస్కృతి, సంప్రదాయాలను ఇందులో ప్రతిబింబించాం. చెన్నై, రాజస్థాన్‌, గోవా, మహారాష్ట్ర తదితర రాష్ట్రాల్లో కీలక సన్నివేశాలను తెరకెక్కించాం.

ఇమాన్‌ అద్భుతమైన సంగీతాన్ని అందిస్తున్నారు. త్వరలోనే సినిమాను విడుదల చేయనున్నామని' పేర్కొన్నారు. రూబన్‌ ఎడిటర్‌గా వ్యవహరిస్తున్నారు.