వియన్నా: అమెరికా నేతృత్వంలోని ఆరుదేశాల కూటమితో కుదుర్చుకున్న అణుఒప్పందంలోని నియమ నిబంధనలకు ఇరాన్‌ ఇప్పటికీ కట్టుబడి వ్యవహరిస్తోందని అంతర్జాతీయ అణుశక్తి సంస్థ (ఐఎఇఎ) స్పష్టం చేసింది. ఈ ఒప్పందం నుండి అమెరికా వైదొలగి, ఇరాన్‌పై ఆంక్షలు పునరుద్ధరించిన తరువాత దీని భవితపై అనిశ్చితి కొనసాగుతున్న నేపథ్యంలో ఐఎఇఎ తన నివేదికలో ఈ విషయాన్ని వెల్లడించటం గమనార్హం. ఇరాన్‌లో అణు కార్యక్రమాలు కొనసాగుతున్న అన్ని ప్రదేశాలను సందర్శించేందుకు తమకు వెసులుబాటు లభించిందని ఐఎఇఎ తన తాజా నివేదికలో పేర్కొంది. అయితే ఈ ప్రాంతాలను పరిశీలించటానికి తమకు సమయానుకూలంగా ఇరాన్‌ సహకరించటం అత్యంత ప్రధానమని ఐఎఇఎ వ్యాఖ్యానించింది. ఇరాన్‌లో శుద్ధి చేసిన యురేనియం, భారజల నిల్వలు గత నివేదికలో పేర్కొన్న మొత్తం కంటే కొద్దిగా పెరిగినప్పటికీ ఒప్పందం పరిధిలోనే వున్నాయని వివరించింది.