యూ.ఏ.ఈ:ఐదేళ్ళ బాలుడు, కారులో ఇరుక్కుపోయి ఊపిరి ఆడక ప్రాణాలు కోల్పోయాడు. పాత కారులోకి వెళ్ళిన చిన్నారి, ఆ కారు లాక్‌ అయిపోవడంతో అందులోనే వుండిపోయాడు. గాలి ఆడక బాలుడు ప్రాణాలు కోల్పోయినట్లు అధికారులు పేర్కొన్నారు. అల్‌ అయిన్‌లో ఈ ఘటన చోటు చేసుకుంది. మొదట బాలుడు తప్పిపోయాడని అంతా అనుకున్నారు. అయితే గాలింపు చేపట్టిన పోలీసులకు బాలుడ్ని అత్యంత విషమ స్థితిలో కారులో కనుగొన్నారు. హుటాహుటిన ఆ బాలుడ్ని ఆసుపత్రికి తరలించినా, అప్పటికే చాలా సేపటినుంచి పూర్తిస్థాయిలో ఊపిరి ఆడకపోవడంతో బాలుడు మృతి చెందాడు. తల్లిదండ్రులు తమ పిల్లల భద్రత పట్ల అప్రమత్తంగా వుండాలనీ, ప్రత్యేకంగా కార్ల విషయంలో జాగ్రత్తలు తీసుకోవాలని అధికారులు సూచించారు.