మస్కట్‌: మినిస్ట్రీ ఆఫ్‌ మేన్‌ పవర్‌, ఉద్యోగావకాశాలకు సంబంధించి హెచ్చరికను జారీ చేసింది. సల్తానేట్‌ వెలుపల ప్రచారంలో వున్న ఉద్యోగావకాశాలతో ఒమన్‌ ప్రభుత్వానికి ఎలాంటి సంబంధం లేదని ఈ ప్రకటనలో పేర్కొంది. ఆయా ప్రకటనలకు సంబంధించిన విశ్వసనీయతను ఉద్యోగార్ధులే సరిచూసుకోవాలనీ, ఎట్టి పరిస్థితుల్లోనూ ఫేక్‌ ఉద్యోగావకాశాల ప్రకటనల్ని చూసి మోసపోవద్దనీ మినిస్ట్రీ ఆఫ్‌ మేన్‌ పవర్‌, వలసదారులకు సూచించింది. ఒమనైజేషన్‌ కారణంగా వివిధ విభాగాల్లో నాన్‌ ఒమనీస్‌కి అవకాశాలు క్రమంగా తగ్గిపోతున్న దరిమిలా, ఆయా శాఖల్లో ఉద్యోగాలంటూ ఎలాంటి ప్రకటనలు వచ్చినా, సరిచూసుకోవాలని ఒమన్‌ మినిస్ట్రీ హెచ్చరించడం జరిగింది.