సౌదీ అరేబియా: ఇటీవలే పబ్లిక్‌ ఇష్యూకు వచ్చిన సౌదీ అరేబియాకు చెందిన ఆయిల్‌ దిగ్గజం అరామ్కో.. ట్రేడింగ్‌ బుధవారంనాడు ప్రారంభమైంది. తొలి రోజే షేరు ధర దూసుకుపోయింది. ఆరంభంలోనే 10 శాతం మేర షేరు ధర పెరగడంతో కంపెనీ విలువ 1.88 లక్షల కోట్ల డాలర్లకు చేరుకుంది. ఈ స్థాయిలో ప్రపంచంలో లిస్టయిన ఏ కంపెనీ మార్కెట్‌ విలువ లేదు. రియాద్‌లోని సౌదీ తడావుల్‌ స్టాక్‌ ఎక్స్ఛేంజీలో ఉదయం 10.30 గంటలకు అరామ్కో షేర్ల ట్రేడింగ్‌ ఆరంభమైంది. పబ్లిక్‌ ఇష్యూ ద్వారా 1.5 శాతం వాటాను విక్రయించారు. ఒక్కో షేరు ధరను 32 సౌదీ రియాల్స్‌ (8.53 డాలర్లు)గా నిర్ణయించారు. షేరు ధర 10 శాతం మేర పెరగడంతో 35.2 రియాల్స్‌కు చేరుకుంది. దీంతో మార్కెట్‌ విలువ 1.8 లక్షల కోట్ల డాలర్లకు చేరింది. ప్రస్తుతం అరామ్కో మార్కెట్‌ విలువ మైక్రోసాఫ్ట్‌ లేదా యాపిల్‌కన్నా ఎక్కువగా ఉంది.