అమెరికా:ప్రముఖ ఈ-కామర్స్ సంస్థ అమెజాన్ వ్యవస్థాపకులు, ప్రపంచపు అత్యంత ధనవంతుడైన జెఫ్ బెజోస్ ఫోన్ హ్యాకింగ్‌కు గురైన అంశం వెలుగు చూసింది. 2018లో తన ఫోన్ హ్యాకింగ్‌కు గురైనట్లు ప్రముఖ అంతర్జాతీయ పత్రిక గార్డియన్ కథనాన్ని ప్రచురించింది. సౌదీ యువరాజు మొహ్మద్ బిన్ సల్మాన్ నుంచి జెఫ్ బెజోస్‌కు వెళ్లిన ఓ వాట్సాప్ మెసేజ్ ద్వారా ఇది హ్యాకింగ్‌కు గురైనట్లు గుర్తించడం జరిగింది.

సౌదీ యువరాజు మొహ్మద్ బిన్ సల్మాన్‌ వ్యక్తిగత వాట్సాప్‌ అకౌంట్‌ నుంచి వైరస్‌తో కూడిన వీడియో ఫైల్‌ను పంపడం ద్వారా 2018 నుంచి అమెజాన్‌ చీఫ్‌ ఫోన్‌కు సంబంధించిన డేటా చోరీకి గురైందని డిజిటల్‌ ఫోరెన్సిక్‌ విశ్లేషణ పేర్కొందని గార్డియన్‌ కథనం వెల్లడించింది. జెఫ్‌ బెజోస్‌ ఫోన్‌ నుంచి ఎలాంటి డేటా చోరీకి గురైందనేది తెలియదని వ్యాఖ్యానించింది. జెఫ్‌ బెజోస్‌ ఆయన భార్య మెకంజీలు పాతికేళ్ల వైవాహిక బంధానికి వీడ్కోలు పలుకుతూ విడాకుల నిర్ణయాన్ని ప్రకటించిన ఏడాది తర్వాత ఈ కథనం వెల్లడవడం గమనార్హం.