షార్జా:షార్జాలో అగ్నిప్రమాదానికి గురైన అబ్కో టవర్‌ బాధితులకు తగిన సాయం చేయాలని షార్జా రూలర్‌ డాక్టర్ షేక్ సుల్తాన్‌ బిన్ ముహమ్మద్‌ అల్ ఖసిమి అన్నారు. టవర్ లో ఉండే వాళ్లందరికీ తగిన నివాస సౌకర్యం కల్పించాలని షార్జా చారిటీ అసోసియేషన్‌ ను ఆయన ఆదేశించారు. టవర్‌ లో మరమ్మత్తులు పూర్తై మళ్లీ సాధారణ పరిస్థితులు నెలకొనే వరకు ఖచ్చితంగా ఆవాసం కల్పించాల్సిందేనని అన్నారు. ఇదిలాఉంటే..షార్జా అగ్నిప్రమాద ఘటనను కొందరు వ్యక్తులు తమ స్వప్రయోజనాలకు వాడుకునే కుట్రలు చేస్తున్నట్లు షార్జా పోలీసులు వెల్లడించారు. బాధితులకు సాయం చేయాలంటూ సోషల్‌ మీడియాలో వచ్చే మెసేజ్‌ లకు ఎట్టి పరిస్థితుల్లోనూ స్పందించొద్దని హెచ్చరించారు. అగ్నిప్రమాదం బాధితులకు ప్రభుత్వం తరపున అన్ని రకాల సాయం అందుతోందని, వారి ఇబ్బందులను ఎప్పటికప్పుడు తెలుసుకొని సాయం చేసేందుకు అధికారిక కమిటి కూడా ఏర్పాటు చేసిన విషయాన్ని పోలీసులు గుర్తు చేశారు. ఒకవేళ ఎవరైనా సాయం చేయాలని అనుకుంటే షార్జా చారిటీ అసోసియేషన్‌ ద్వారాగానీ, ఎమిరాతి రెడ్‌ క్రిసెంట్‌ ద్వారా సాయం చేయాలని కోరారు.