దోహా:లాక్ డౌన్ తర్వాత తిరిగి సాధారణ జనజీవనం దిశగా అడుగులు వేస్తున్న ఖతార్ ప్రభుత్వం..ఇక స్కూళ్ల పున:ప్రారంభంపై ఫోకస్ చేసింది. దశల వారిగా అన్ లాక్ మార్గదర్శకాలను జారీ చేస్తున్న ప్రభుత్వం..2020-2021 విద్యాసంవత్సరానికి సంబంధించి షెడ్యూల్ విడుదల చేసింది. ఈ మేరకు సెప్టెంబర్ 1 నుంచి అన్ని ప్రభుత్వ, ప్రైవేట్ స్కూళ్లను ప్రారంభిస్తున్నట్లు విద్యా మంత్రిత్వ శాఖ ప్రకటించింది. అయితే..ప్రభుత్వ, ప్రైవేట్ స్కూల్ ఉద్యోగులు మాత్రం వచ్చే నెల 19 నుంచే విధులకు హజరుకావాలని కూడా సూచించింది. అంతేకాదు...ఉద్యోగులు, విద్యార్ధులు అటెండెన్స్ విషయంలో ఎలాంటి మినహాయింపులు లేవని కూడా మంత్రిత్వ శాఖ స్పష్టం చేసింది. అయితే..కరోనా నేపథ్యంలో ఉద్యోగులు, విద్యార్ధుల ఆరోగ్య భద్రతకు అన్ని ముందస్తు జాగ్రత్తలు చేపట్టాలని కూడా ఆదేశించింది.