వివాహ వేడుకను బంధుమిత్రుల మధ్య ఘనంగా జరుపుకోవాలనుకుంటారు మనదేశంలో. కానీ ఇతర దేశాల యువత మాత్రం ఎంత వినూత్నంగా జరుపుకోవాలా అని చూస్తోంది. లాట్వియా దేశానికి చెందిన 50 ప్రేమ జంటలు వాలెంటైన్స్‌ డే రోజు వివాహం చేసుకోవాలనుకున్నాయి. అది కూడా హాట్‌ ఎయిర్‌ బెలూన్‌లో. అంతేకాదు.. ఈ వివాహ వేడుకతో గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో స్థానం సంపాదించాలన్నది వారి ఆశయం.ప్రణాళిక ప్రకారం అన్ని ఏర్పాట్లూ చేసుకున్నారు. యాభై జంటలు పెళ్లి చేసుకోవడానికి 30 హాట్‌ఎయిర్‌బెలూన్లను సిద్ధం చేసుకున్నారు. అయితే ఆరోజు విపరీతంగా మంచుకురవడం మొదలైంది. దాంతో బెలూన్లను కార్లకు అనుసంధానించారు. అవి 15 మీటర్ల కన్నా ఎత్తుకి వెళ్లడానికి వీల్లేకపోయింది. అలా మొత్తానికి పెళ్లి తంతు అయితే జరిపించారు కానీ, మంచు అవాంతరం నేపథ్యంలో గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లో స్థానం దొరుకుతుందో లేదో వేచి చూడాల్సిందే.