మనామా:కరోనా సోకకుండా ఫేస్ మాస్క్ పెట్టుకోలేదు..పైగా ఫైన్ వేసిన పోలీసులనే కించపరిచేలా వ్యవహరించాడో వ్యక్తి. దీంతో అతనికి ఏడాది జైలు శిక్ష పడింది. నార్తర్న్ బహ్రెయిన్ లోని అల్ ముహర్రఖ్ లో ఈ ఘటన చోటు చేసుకుంది. కరోనా వ్యాప్తి నియంత్రణలో భాగంగా బహిరంగ ప్రదేశాల్లో ప్రతి ఒక్కరు విధిగా ఫేస్ మాస్క్ ధరించాల్సిందేనని బహ్రెయిన్ ప్రభుత్వం ఆదేశాలు జారీ చేసిన విషయం తెలిసిందే. లేదంటే జరిమానా విధిస్తామని ఇదివరకే హెచ్చరించింది. అయితే...నిందితుడు మాత్రం కోవిడ్ నిబంధనలను లెక్క చేయలేదు. మాస్క్ పెట్టుకోకుండా ఫ్రెండ్స్ కలిసి పబ్లిక్ ప్లేసులో చిట్ చాట్ చేస్తుండటంతో పోలీసులు అతన్ని వారించారు. మాస్క్ పెట్టుకోనందుకు అతనికి ఫైన్ విధించారు. అయితే..నిందితుడు మాత్రం ఫైన్ కట్టకుండా...పోలీసులను కించపరిచేలా వ్యవహరించాడు. దీంతో అతన్ని అదుపులోకి తీసుకొని కోర్టు బోనులో నిలబెట్టారు పోలీసులు. విచారణ చేపట్టిన మైనర్ క్రిమినల్ కోర్టు నిందితుడికి ఏడాది జైలు శిక్షతో పాటు..1000 దినార్ల జరిమానా విధించింది.