ఒమాన్: దేశంలో రియల్ ఎస్టేట్ రంగానికి ఊతం ఇచ్చేలా ఒమన్ ప్రభుత్వం కీలక నిర్ణయాలు తీసుకుంది. రియల్ ఎస్టేట్ కు సంబంధించి జరిగే క్రయ విక్రయాలపై ఫీజును 3 శాతానికి తగ్గించనున్నట్లు తెలిపింది. 2020-24 మిడ్ టర్మ్ ఆర్ధిక ప్రణాళికలో భాగంగా ఈ సవరణలు చేసినట్లు ఆర్ధిక శాఖ వెల్లడించింది. కరోనా తర్వాత సంక్షోభం ఎదుర్కొంటున్న రంగాల్లో రియల్ ఎస్టేట్ కూడా ఉంది. ఈ సమయంలో రియల్ ఎస్టేట్ ట్రాన్సాక్షన్ ఫీజులను తగ్గిస్తూ ఒమన్ ప్రభుత్వం తీసుకున్న నిర్ణయం రియాలిటీ రంగానికి కొద్దిమేర ఊరట కలిగించే అవకాశాలు ఉన్నాయి. గృహనిర్మాణ, పట్టణ ప్రణాళిక మంత్రిత్వ శాఖ అవలంభించనున్న రియల్ ఎస్టేట్ సవరణల ప్రకారం..రియల్ ఎస్టేట్ ఫీజు ట్రాన్సాక్షన్ 5 నుంచి 3 శాతానికి తగ్గనుంది. లీజ్ కు సంబంధించిన లైసెన్స్ రుసుము వాయిదాల ద్వారా చెల్లించవచ్చు. నిర్దేశిత ఫీజు చెల్లించి భవనం అంతస్తులకు అనుమతి ఇవ్వనున్నారు. అలాగే నిర్దేశిత ప్రాంతాల్లో ఒమనీయేతరులు కూడా బహుళ అంతస్తుల వాణిజ్య సముదాయాల నిర్మాణాలు చేపట్టేందుకు అనుమతి ఇవ్వనున్నారు.