సౌదీ: మక్కా మసీదులో కారు ప్రమాదం తర్వాత..పవిత్ర మసీదు వైపు వెళ్లే అన్ని దారుల్లో కట్టుదిట్టమైన భద్రత చర్యలు చేపట్టారు అధికారులు. పవిత్ర మక్కా మసీదు వైపు వెళ్లే దారుల్లో బారికెడ్లను ఏర్పాటు చేశారు. అలాగే వాహనాల వేగాన్ని నియంత్రించేందుకు పలు చోట్ల స్పీడ్ బ్రేకర్లను ఏర్పాటు చేశారు. గత శుక్రవారం ఓ కారు అదుపు తప్పి మక్కా మసీదు ద్వారాన్ని ఢికొట్టిన విషయం తెలిసిందే. అతన్ని అరెస్ట్ చేసిన భద్రతా సిబ్బంది..ప్రమాదం జరిగిన సమయంలో కారు డ్రైవర్ అసాధారణ స్థితిలో ఉన్నాడని వెల్లడించారు. ఇకపై పవిత్ర మసీదు ప్రాంతంలో ఎలాంటి అవాంఛనీయ సంఘటనలు చోటు చేసుకోకుండా..వాహనాలు మసీదు వైపు దూసుకు రాకుండా బారికెడ్లు, స్పీడ్ బ్రేకర్లను ఏర్పాటు చేశారు. అయితే..నడుచుకుంటూ మసీదుకు వచ్చే బక్తులకు ఎలాంటి ఇబ్బందులు లేకుండా కూడా తగిన జాగ్రత్తలు తీసుకున్నారు.