సౌదీ మహిళలనుగానీ, సౌదీ పురుషుడ్నిగానీ పెళ్లి చేసుకొని ఏ కారణం చేతనైనా విడిపోయిన వ్యక్తులు రెండు నెలల్లో స్పాన్సర్ షిప్ ను బదిలీ చేసుకోవాలని సౌదీ ప్రభుత్వం హెచ్చరించింది. ఒకవేళ సౌదీని పెళ్లి చేసుకున్న ప్రవాసీయులు..తమ భాగస్వామి మృతి చెందినా రెండు నెలల్లోనే స్పాన్సర్ షిప్ బదిలీ చేసుకోవాలని స్పష్టం చేసింది. అలాగే సౌదీ మహిళ, ప్రవాసీయుడ్ని వివాహమాడి..ఆమె సంతానం 18 ఏళ్లు నిండినట్లైతే వారికి కూడా స్పాన్సర్ షిప్ అవసరం అవుతుందని వెల్లడించింది. రెండు నెలల గడువులోగా పైన చెప్పిన ప్రవాసీయులు, ప్రవాసీయురాలు తగిన ఉపాధిని చూసుకోవాల్సి ఉంటుంది. ఒకవేళ ఈ రెండు నెలల గడువులోగా తగిన ఉద్యోగంలో చేరకపోతే..సదరు ప్రవాసీయులు దేశం విడిచి వెళ్లాల్సి ఉంటుందని కూడా సౌదీ ప్రభుత్వం హెచ్చరించింది. స్పాన్సర్ షిప్ బదిలీ కోసం..మానవ వనరుల మంత్రిత్వ శాఖకు చెందిన అన్ని ప్రాంతీయ కార్యాలయాల్లో దరఖాస్తు చేసుకోవాల్సి ఉంటుంది. దరఖాస్తు ఫారమ్ తో పాటు సౌదీని పెళ్లి చేసుకున్న వ్యక్తిని పెళ్లి చేసుకున్నట్లు సర్టిఫికెట్ జతపరచాల్సి ఉంటుంది. అలాగే పాస్ పోర్టు కూడా దరఖాస్తు ఫారమ్ తో జత చేయాలి.