మూడేళ్ల తర్వాత సౌదీ అరేబియా-ఖతార్ సరిహద్దులు తెరుచుకున్నాయి. రెండు గల్ఫ్ దేశాల మధ్య వివాదాలు సమసిపోయి దౌత్య సంబంధాలు పునురుద్ధరించుకున్న తర్వాత..పలు కీలక నిర్ణయాలు వెలువుడుతున్న విషయం తెలిసిందే. ఇందులో భాగంగానే రెండు దేశాల మధ్య విమానాలు, రహదారి సరిహద్దులు, సీ పోర్టుల ద్వారా రవాణా ప్రారంభిస్తున్నట్లు సౌదీ అరేబియాలో ఇప్పటికే ప్రకటించింది. ఈ మేరకు శనివారం తొలిసారిగా ఖతార్ నుంచి బయల్దేరిన కారు సాల్వా సరిహద్దు మీదుగా సౌదీ అరేబియాకు చేరుకుంది. అయితే..కోవిడ్ నేపథ్యంలో అన్ని జాగ్రత్త చర్యలు తీసుకుంటున్నామని సౌదీ ప్రభుత్వం ప్రకటించింది. సాల్వా సరిహద్దు దగ్గర కోవిడ్ సెంటర్లను ఏర్పాటు చేసినట్లు అధికారులు తెలిపారు. ఖతార్ నుంచి వచ్చే వారు తప్పనిసరిగా కోవిడ్ నెగటివ్ సర్టిఫికెట్ చూపించాలని..అలాగే కోవిడ్ టెస్ట్ తో పాటు మూడు రోజులు క్వారంటైన్ లో ఉండాలని సూచించారు.