రియాద్:వాట్సాప్ ద్వారాగానీ, టెక్ట్స్ మెసేజ్ ద్వారాగానీ భార్యకు తలాక్ మెసేజ్ పంపిస్తే విడాకులు ఇచ్చినట్లే పరిగణించబడుతుందని సౌదీలోని ఇస్లాం మత పెద్దలు స్పష్టం చేశారు. మొబైల్ సందేశం ఇవ్వటం అంటే రాతపూర్వకంగా చెప్పటమేనని, అందుకే వాట్సాప్, టెక్ట్స్ మెసేజ్ ద్వారా విడాకులు ఇచ్చినా అవి చెల్లుబాటు అవుతాయన్నారు. ఇది షరియా ఇస్లామిక్ మతాచారాలు, నిబంధనలు లోబడి ఉన్నట్లు సౌదీ అరేబియాలోని ఇస్లామిక్ బాడీ సభ్యుడు షేక్ అబ్దుల్లా అల్ మత్లాఖ్ స్పష్టం చేశారు. ఓ భర్త తన భార్యకు వాట్సాప్ ద్వారా విడాకుల ప్రమాణం చేస్తే..దాన్ని విడాకులుగా పరిగణించాల్సి ఉంటుందన్నారు. ఇదిలాఉంటే ఇటీవలి కాలంలో సౌదీ అరేబియాలో విడాకుల శాతం పెరుగుతున్నట్లు తాజా గణాంకాలు చెబుతున్నాయి. దాదాపు పది మంది దంపతుల్లో ముగ్గురు విడాకులు తీసుకుంటున్నట్లు అధికారిక గణాంకాల ద్వారా స్పష్టం అవుతోంది.