ప్రస్తుతం క్యారెక్టర్‌ నటుడిగా బిజీగా ఉన్న ఒకప్పటి హాస్య కథానాయకుడు నరేశ్‌ డాక్టర్‌ అయ్యారు. అమెరికాలోని అకాడమీ ఆఫ్‌ యూనివర్సల్‌ గ్లోబల్‌ పీస్‌ ఆయనకు గౌరవ డాక్టరేట్‌ ప్రదానం చేసింది. ఈ సందర్భంగా నరేశ్‌ మాట్లాడుతూ దక్షిణాదిన తనకు, కర్ణాటకకు చెందిన ఓ నృత్య కళాకారిణికి డాక్టరేట్‌ ఇచ్చారని తెలిపారు. తనకు నటనలో ఓనమాలు నేర్పిన జంధ్యాల, విజయ నిర్మల, కృష్ణ, తెలుగు సినీ ప్రేక్షకులకు ఈ డాక్టరేట్‌ అంకితం చేస్తున్నట్లు నరేశ్‌ చెప్పారు.ఇటీవలే తెలంగాణ స్పీకర్‌ మధుసూదనాచారి చేతుల మీదుగా తాను నవరసరాయ అనే బిరుదును అందుకున్నానని, అదే సమయంలో ఈ డాక్టరేట్‌ కూడా అందుకోవడం మరింత ఆనందంగా ఉందని అన్నారు.